家啲影音產品玩大又玩細，好似美國投影機生產商Optoma啱啱推出咗第二代DLP掌上型投影機OptomaPK-102，聲稱全球最輕，重量只有90克，連電池就124克。Size同一部智能手機差唔多，長闊高只不過係106×51×17毫米，可以放喺衫袋周圍走。
支援rmvb格式
唔好睇小部機咁細，以為玩具機，規格都好鬼專業，解析度有成480×320標清嘅畫面，最大可支援到800×600，對比度1000：1，採取LED光源，毋須更換燈泡，壽命可達2萬小時，最大可以投射60吋畫面。
潮流連鎖店JCShop負責人Alan話，部機另一個特點係首部內置4G記憶體同影音播放功能嘅掌上型投影機，可以直接駁電腦下載影片，支援家最興嘅rmvb格式，「將啲片download落咗部機，行去邊都播得，有埋內置喇叭，唔會有畫冇聲。」
Alan又話，PK-102固然可接駁DVD播放器，仲可以駁埋iPod、數碼相機同攝影機、PSP及手機等，播放靜態、動態影像，「部機有埋叉電，充電一次大約可以用1.5小時，售價係3,680元。」
小藍攞部機接駁DVD機播片，投60吋畫面，效果都唔錯；畫質當然比唔上萬幾蚊嘅DLP高清投影機，但勝在攜帶方便，同埋可以喺電腦下載影片睇大投影。