香港人最憎俾人屈，偏偏高官最鍾意屈市民，施政報告提出兩電派100蚊現金券畀用戶買慳電膽，表面似益你，實際係屈你換新燈膽，仲要逼你日後可能要加電費。令人更火滾係原來煲呔親家莫錦泉係「慳電膽大王」，背後有人照住，怪唔得煲呔咁熱衷要市民換慳電膽啦！
妄想減稅？醒吓啦！
台灣阿扁家族貪腐醜聞令人震驚，香港第一家庭有冇利益輸送，八方相信好多市民都想執法機關介入查個清楚，有網民已經將煲呔改圖變成阿扁，高登討論區更有人改編錯字才女Stephy首歌《電燈膽》，而且網上火速有真人演繹版本，諷刺煲呔強銷慳電膽益晒親家。
改寫歌詞由網民集體創作，水準如何大家可自行評價，唔少網民都認為有佳句，八方覺得副歌部份最抵死，「難承認嘛，我故意sell那電燈膽，加盡你們平常人電費也不難，望良民流露着困惑的雙眼，妄想一天稅項會減？你醒吓啦。」
網民勁改歌詞玩煲呔樂此不疲，各位如果有興趣，都可以玩埋一份，八方上網，好多人都話聽完首歌先明白點解施政報告忽然派燈膽券，有網民嘆香港人又走寶，「內地都好多人用更環保嘅LED燈，成本仲平，慳電更多，可惜曾生無親戚做代理。」
mailto:[email protected]
《慳電膽》歌詞
（寄調《電燈膽》）
今鋪擺明姻親有賺 博佢大貪接受
扶貧全要滯後 財富贈舊朋友
昨日被掟香蕉 返官邸痛哭 明晨面對毓民諗起就頭痛
如何令佢哋 靜下咪起哄
誰都知家玩你班廢物 其實全心想捐獻大陸人
其實市民受夠期望已全沒有 應該搬走還是跳樓
能迴避嘛 我故意sell那電燈膽
聽著你們 滋滋浸 議會中受難
搞政策我無膽 靠亂吹死撐
靠北京關照是我揀
難承認嘛 我故意sell那電燈膽
加盡你們 平常人 電費也不難
望良民流露着困惑的雙眼
妄想一天稅項會減 有加無減
你哋個個都想 出身即買樓 然而其實私樓抵玩又唔貴
如噚日買落 下代至供夠
籠屋加橋底 都無得你住 如若排隊公屋似沒盡期
權利你們沒有 群賊我來獨奏 香港點走全在我手
來迴避喇 我故意剝削着中產
福利免提 而同時 稅單一大叠
賤民人人捱餓 我做官很嘆
使乜餐餐要同你慳
能逃避嘛 我要你裝那電燈膽
欺虐你們 無人能 罷免我職銜
有強權無道理 注定屈死你
妄想中央會讓你揀 你醒吓啦