南華前晚在亞協盃4強首回合作客雖不敵科威特競技，但憑守衞卓卓在補時階段取得重要的作客入球，僅輸1:2，這賽果令南華下周三主場只要贏1:0，便足以躋身下月3日在香港大球場上演的決賽。
有望於主場見證南華反勝入決賽，次回合門票預售反應更熱烈，單計昨日共賣出近3,000張，而截至昨晚已售出近8,000張，特惠票更已售罄。
羅生望3萬人入場
昨晚領軍返港的足主羅傑承表示，已知悉門票熱賣：「剛有同事通知，今（昨）日各個售票處都多咗好多球迷買飛，至今已預售8,000張，如果臨場天氣好，再做宣傳，我覺得可以有3萬人入場，多點球迷着紅衫入場打氣，會令客隊好難打。」賽事門票續在足總、銅鑼灣皇室堡bmastudio及尖沙嘴adidas旗艦店預售。
南華前晚作客科威特競技，經過沉悶的上半場，主隊易邊後3分鐘，在2,000名球迷面前由巴林國腳馬祖基頭槌建功打破僵局；79分鐘，再有華里德阿里在左路邊線快放傳予阿爾阿澤米於門前鏟射入網，助競技擴大領先優勢。
不過，南華在尾段未有放棄，結果今季加盟的港隊中堅卓卓在補時階段把握角球機會，乘對手不集中之際在門前取得關鍵作客入球。落後1:2的南華於下周三（21/10）舉行的次回合，只要贏對手1:0便能歷史性打入亞協盃決賽；這戰果有效刺激門票銷情，相信入場人數勢破8強對尼夫治時的2萬球迷。
南華教練金判坤賽後表示，滿意球隊全場依足指示比賽：「這不是一個壞賽果，我們有信心在次回合收復失地，但首要是不失球。」此戰表現患得患失的守衞李志豪，因累積兩面黃牌下場需停賽。
競技今抵港明開操
南華明午6時，會再在南華會天台吧舉行誓師大會，詳情可瀏覽南華官方網站 http://www.southchinafc.com/。而競技為適應香港天氣，提前今日乘包機到港，明日在小西灣進行首課操練。
此外，足總發言人昨日表示，已得悉下周三除於大球場舉行亞協盃外，還會在跑馬地跑夜馬，故已與警方保持緊密聯絡，視乎預售情況再決定保安人數。
本報訊
花絮：網上直播搞到大塞車
上次南華作客尼夫治冇得睇，前晚作客對科威特競技終於有得直播，不過就喺唔係人人都有嘅高清台，所以唔少球迷都上網睇波，自不然搞到網絡大塞車（圖），開頭15分鐘更加load幾次都唔得，球迷怨聲載道，希望下次直播唔好放喺高清啦！
花絮：「兢」技有玄機
有得直播固然係德政，不過配套就爭啲，好似咁大嘅比賽，又冇咗「鎖匙人」助陣，氣氛已經爭啲；最慘喺左上角個球隊比分，連人哋個隊名都變咗「兢」技（圖），結果競技戰戰兢兢之下，真係臨天光畀南華射入一粒，形勢頓時逆轉。
花絮：羅太撐場電視台實
前晚嘅比賽喺科威特上演，現場大多係穿上傳統服裝嘅主隊球迷，幾乎清一色係男性，據少林寺方面透露，全場女士少之又少，得幾個包到實嘅主隊球迷，其餘兩個就係少林寺職員同埋羅太。唔知係咪絕少女球迷，比賽期間一度zoom埋羅太嘅大頭度（圖）成十秒。
