號稱政界酒筲箕嘅中指黃宜弘都有老貓燒鬚嘅時候。噚日煲呔同多個高官應邀到立法會食晏，中指黃同民建聯李慧琼、民主黨涂謹申、金管局總裁陳德霖及商務及經濟發展局局長劉吳惠蘭等人同枱，話晒都係其中一個主人家，現場消息稱中指黃席間頻頻勸酒，仲先飲為敬杯杯清。
酒過三巡，中指黃忽然向身邊人講：「李慧玲，你都飲啦！」同枱人士面面相覷，商台女主持人李慧玲有到咩？李慧玲無到，原來中指黃嗌錯名，誤把李慧琼叫做李慧玲，李慧琼雖然係新丁，但好歹都係直選議員，由幾萬個選民投票產生，中指黃有眼不識，要由劉吳惠蘭提佢，「人哋係李慧琼議員呀！」