立法會各個事務委員會噚日一年一度選舉正、副主席，白鴿黨卿姐屢敗屢戰，再度角逐政制事務委員會主席，同民建聯譚耀宗硬撼，結果一如所料無驚喜，25票對11票，譚耀宗贏到開巷。
卿姐再競逐副主席，對手係「專業聯盟」何鍾泰，公佈結果一刻好多人O嘴，因為老何只得23票，卿姐多兩票進賬，有13人支持佢，卿姐雖然輸咗，不過表情好驚喜，正所謂輸少當贏吖嘛。
卿姐建議下次改蓋章
幾年前卿姐擊敗中指黃宜弘做財委會主席，事後傳出中聯辦邀請保皇派議員去西環照肺，想揪出無間道；噚日有兩人變節，恐怕西環又要動手揪出Laughing哥。卿姐夠義氣，保護暗中撐佢人士，建議下次選舉唔用筆改用蓋章投票，等西環冇咁易捉鬼。譚耀宗則話秘書處會隨即銷毀選票，歡迎議員到場監察銷毀過程。
至於誰是Laughing哥，有人分析，冇同「專業聯盟」埋堆嘅幾個無黨派議員最有機會，亦有人指自由黨向來同何鍾泰冇偈傾，另一嫌疑人物係謝偉俊，事關佢無定向風，真係估佢唔到o架。