楊怡和林峯前晚在廟街拍攝無綫新劇《談情說案》煞科戲，劇情講述林峯當街求婚得米，在一眾「街坊」起哄下，兩人貼身攬攬極其親熱。其後一眾演員往酒家晚飯時，外表斯文的楊怡竟隊啤豪飲，林峯更拋開靚仔形象用手指撩牙，真性情盡現。
無綫新劇《談情說案》前晚在廟街拍攝煞科戲，劇情描述一身老西打扮的林峯，手持花束當街跪地向楊怡求婚，結果贏得美人歸。在場飾演街坊的羅樂林帶頭起哄，與數十名特約演員齊聲大叫「咀佢、咀佢」，不過林峯和楊怡未有錫錫，只是肉緊抱抱，身貼身攬完再攬。由於兩人曾合作多次，甚有默契，故拍攝順利兼交足戲。
分頭返歸
拍完求婚戲，楊怡和林峯即隨攝製隊到油麻地一間酒樓晚膳，兩人在鏡頭後真情流露，現場見形象斯文的楊怡背對窗口而坐，大啖大啖隊啤，十分豪爽，難怪林峯曾多次形容她似男人，二人要撻着難過登天。
眾人飯後離開酒家時，林峯一馬當先行頭，向來走靚仔路線的他竟用手指撩牙，頗為不雅，但身旁的楊怡似未介懷，繼續與他邊行邊傾，並結伴步往附近街頭續拍一場車廂戲。至11時許拍畢外景，楊怡隨公司車返將軍澳電視廣播城，取回其準姊夫楊志翹名下的40萬福士座駕後，再獨自駕車返將軍澳寓所。
為母賀壽
此外，楊怡日前為其母舉行生日宴，她更在網誌內張貼當日與母親拍下的鬼馬合照，不過相中的楊媽媽背對鏡頭，楊怡寫道：「我媽咪今年嘅生日，除咗準備咗個生日會畀佢之外，當晚佢整個造型，由頭到腳，包括耳環、頸鏈、服裝、鞋、髮型、化妝都係由我精心設計o架！」但她不欲母親樣子曝光，故刻意安排媽咪做「影後」。而下周一由楊怡孭飛的台慶重頭劇《宮心計》便會播出。
採訪、攝影：黃文偉、李志明