到「賀菊」食完日本餐，行路返寫字樓之時，見到置地廣場內一間老字號Rudolph擺出ClearanceSale（結業大平賣）標語，吃了一驚，對朋友講：「唉吔，呢間係置地廣場老租客噃，在同一位置賣西裝恤衫，有三十年以上歷史，總之有置地廣場咁耐，就有呢間Rudolph咁耐，點解去年金融海嘯唔執笠，到經濟復甦之時，佢竟然唔做呀？」
中環租金貴，好少商店可以在同一舖位經營三十餘年，置地廣場內，外國名店林立，Rudolph能夠立足三十餘年，置地公司又唔以租戶重組為理由，趕走呢間本地牌子，可算異數。記得女賓架梁太、賓架彭，以至置地大班彭等人做trainee之時，呢間店舖已經存在，左丁山第一次在此買西裝，腰圍只有二十九吋，着細碼。想當年，邊度有錢（至今都冇）去幫襯法國、意大利字母名牌吖，到Rudolph買西裝就啱啱好，質料唔算好靚，但見得人，最啱中環新紮師兄穿着，除非你係分析鄧，老早就可以幫襯「布碌斯兄弟」。
過咗兩個禮拜，唔抵得，特登走去Rudolph買衫，以表支持，亦算係回憶懷舊，其實自己已經有十幾二十年冇幫襯過咯，點知入到去，啱啱好，啲大碼衣服就齊全，中碼細碼衫就好似俾人掃清晒，現在左丁山嘅身材，梗係要大碼先至fit啦，於是扮大手筆，一口氣買三件單衫、一件中褸，算係向呢間老舖致敬，佢執咗之後，中環人又冇咗一個集體回憶。
後來打聽到，呢間舖頭仍有生意，但盈利不高，創辦人兼老闆已年過八十，下一代無意繼承，於是老闆決定金盆洗手，退休結業。呢間西裝店多數用日本料子，香港工場縫製，結業之後。恐怕冇乜其他舖頭如此做咯，唔係深圳縫製先至奇。
Rudolph結業之年，亦係好多銀行老友退休或即將退休之時，新一輩賓架或者另有所好，略嫌本地產品outout地，IFC之倫敦名牌西裝先至夠品味。年初退休嘅賓架Ｔ對左丁山講：「唔好掛住集體回憶嘞，你嘅二十九吋腰圍已一去不復返，要向前看就係防止失憶，食銀杏葉精華啦，唔係食白果呀！」唉，即刻諗起高校長，無限感慨，賓架Ｔ記得前年在山光道馬會與高校長夫婦打網球，更加唔敢相信「那個人已經不在了！」