H-D嘅意思唔係高清，而係美國豪華巡航車Harley-Davidson縮寫。今日介紹呢位仁兄KenChan，佢獨沽一味只改呢類美國電單車。曾經連續兩年奪取全港美式改裝車冠軍，只要畀副HarleyV偈佢，就可以變出超乎想像嘅造型。
文：阮小天
攝影：陳陶鈞
鳴謝：SKC（93675675）
招牌圖案型格演繹……
吾熟吾改
今日筆者就遠赴元朗SKC工場朝聖，睇睇佢點樣將平民版H-D升呢，改到極盡浮誇，勁過大衞高柏飛變魔術。同肥仔攝影師行到身水身汗，終於搵到Ken哥嘅隱蔽基地。前舖後居方便Ken哥一諗到Idea就動工，工場絕對稱唔上華麗，但喺呢個睇落甚至有點簡陋嘅工場內，就曾打造出唔少「名駒」，不過只限純種馬—H-D。「我淨係改Harley，事關自己鍾意，佢係美國文化一部份，你拎架日本車來我唔會整，Friend都係咁話！」果然有性格有原則。除咗揀車改，Ken哥仲有些少堅持，就係要信得佢過。「其實CustomMade就好似一件藝術品咁，九成以上我都會HandMade，精準度當然及唔上機器，但勝在有味道，同個客整車梗要有交流，但我會希望佢認同同喜愛我嘅品味，先至改得開心！B哥四哥嘅車都曾經過我手。」唔講唔知，藝高人膽大嘅Ken哥係無師自通，細細個已經鍾意捐車底，由加拿大改大車到家返到香港玩番電單車，都一樣熱情不減。
改剩副偈
走入佢嘅「辦公室」，發現唔少自製部件，將爛銅爛鐵打造成潮爆油缸，用魔鬼魚皮做Seat位，全部D.I.Y，好有原創性，唔似坊間改車，買大廠Parts返來安裝就當大改造，沒獨特個性！吹完一輪水，Ken哥終於展示佢嘅「傑作」，由於架車成道門咁長，推出來都幾費勁。如果大家係車迷嘅話，都或者曾在車展中見過佢呢件RedDevil！要形容「紅魔」可以用浮誇、型爆同埋面目全非等詞彙。由構思到整個打造過程，都係由佢自己一手策劃，CandyAppleRed鮮紅噴油加上自製油缸腳踏，好誇！由五速波箱改成手動六速再加上可與汽車較量嘅粗軨，真係型爆，全車就只剩副偈取自90年出產嘅Harley。「紅魔」足足用咗九個月時間方能面世，睇完係咪心癢癢？Ken哥話搵佢改車收費豐儉由人，不過呢，最低門檻都要有部H-D，死未？
油缸故事
呢架於91年美國電影「HarleyDavidsonandtheMarlboroMan」出現嘅MarlboroMan，當然又係Ken嘅傑作，全車焦點係油缸嘅啤牌，係Ken以當年電影人物為創作藍本而設計嘅圖案，代表戲中主角MickeyRourke以及佢生命中最重要嘅八位朋友或親人，幾鬼死浪漫，又估唔到呢個整車佬都有浪漫一面！
