今年施政報告含「糖」量近乎零，催眠指數卻十分高，議員、官員身體語言清楚表達對施政報告評價。由於施政報告冇乜關於銀行界措施，金融界議員寶哥哥唔使操心，所以率先覆周公call；涉及飲食界嘅篇幅亦無甚睇頭，所以代表業界嘅議員張宇人亦可以花時間與周公談心去也。
泛民噚日密謀離場抗議，所以人人金睛火眼睇實幾時係合適行動時機，事先張揚令煲呔有機會反擊，一於悶到你班友瞓低，不能離場抗議，民主黨李華明果然捱唔得幾耐，未到半場就忍唔住頻頻「放蚊」。打呵欠係會傳染嘅，坐佢旁邊嘅黨友都紛紛加入「放蚊」行列，大家悶足全場，坐到收工。
大病剛癒嘅財爺鬍鬚曾開會前精神好好，議員紛紛上前慰問佢，點知煲呔宣讀施政報告差啲令佢病情復發，八方現場所見，鬍鬚曾全程昏昏欲睡，思疑係大腦缺氧所致，好彩煲呔唔係太長氣，否則財爺太又要call白車都似。教育局局長孫公平日公務繁忙，噚日正好爭取時間小憩。