煲呔大事不做，噚日發表施政報告時卻同泛民玩文字遊戲。泛民噚日喺議事廳展示寫上「BOWTIEKEEPYOURELECTIONPROMISE」紙牌，要求煲呔履行參選承諾，交出普選時間表路線圖，煲呔讀施政報告中途飲水時，開腔指抗議紙牌有問題，笑笑口話：「好似文法錯咗，英文單數動詞應該有S。」
呢句口號係公民黨幾個大狀千錘百煉「度」出嚟，竟然俾煲呔挑剔，激到幾個大狀彈起，會後群起反駁。余若薇指煲呔英語水平未達標，「錯得好離譜」；吳靄儀話KEEP無S，係因為呢個係command，指令式句子唔使加S，佢呼籲煲呔效法溫總勇於認錯，最好親撰道歉信，「封信畀各大傳媒登喺頭版，指出係自己文法錯誤。」
被恥笑自暴其醜
民主黨卿姐都係咁話，恥笑煲呔自暴其醜，「好心佢啦，唔通我哋讚佢咩，我哋係喝令佢，咁都唔知？」民建聯陳克勤認為唔使加S，不過佢話呢啲文法問題，最好問專家，佢上堂主要練習一般日常會話，文法未必要百分百啱晒。陳克勤深造英文逾年，似乎仲要交啲學費。
煲呔喺記者會後解釋，如果泛民要求佢履行承諾，應該在BOWTIE後加個comma先正確，否則唔係幾啱，所以佢覺得應該加S變成KEEPS，句子意思變成煲呔有信守參選承諾，即係支持佢咁解；難得泛民咁畀面，佢噚日一直和顏悅色對住泛民議員。
資深英語教師兼香港女教師協會主席周蘿茜話，加個逗號在BOWTIE之後確係最正確文法，不過嗰啲既然係抗議紙牌，一般都會理解係要求或命令，唔用逗號亦唔係好大問題。至於煲呔認為改為KEEPS先啱，Miss周指煲呔根本想講另一樣嘢，因為加S字，句子變成presenttense現在式，意思亦唔同咗，「佢咁改，即係想話自己經常有守選舉承諾，唔使其他人叫佢都有做。」煲呔耍小聰明沾沾自喜，如此口舌之爭，贏了又如何？
mailto:[email protected]