高鐵上馬，原以為是意料中事，點知公民黨副主席黎廣德聯同三幾位工程師、學者，臨門提出一個反建議，令到港鐵與政府黑晒面，在官員心中，高鐵嘅路綫，工程策劃與環評，已討論多年，充份照顧到各方意見，唯一唔高興嘅會係菜園村部份村民，因收地而要搬遷。但因為議論得耐，基建成本一路上升，卒之去到近六百億元，議員話貴，官員何曾話便宜吖，不過大勢如此，暫無辦法大幅度壓抑成本咯。
點解通脹全無之環境下，建築成本上升呢？係唔係用懶人思想法，係因為建築商謀取暴利？在上星期五嘅高鐵論壇碰到土木工程師W，問佢點解，工程W話：「我入行二十年，從來未見過有暴利，地產商就可以賣樓賺百幾億啫，我地在地盤捱足三年，卻可能得個桔。自金融海嘯後，各國政府一窩蜂咁印銀紙刺激經濟，最叻就係大搞基建，鐵路、公路、發電站、開山闢地等等土木項目，同時上馬，咪將啲材料搶貴晒囉，幾時輪到香港出聲吖？本地政府亦同時宣佈十大建設，我地呢行一係唔夠飯食，大家去搶，一係十碗飯送埋嚟要我地半小時內食晒落肚，點啃呀，唔係講乜，一時之間，你話我地去邊度買到咁多海沙？」
以前聽過高官講及基建，香港建造業缺乏「炮王」，須急急培訓「有志之士」，但可能唔夠資深炮王，要向內地引入外勞，之不過，工會唔理咁多，必然反對，正為此大傷腦筋。家工程W又講到「缺沙」，咦，問題不少喎。
在高鐵論壇聽鄭汝樺演講，吃過午飯之後，返到寫字樓，《經濟學人》剛好郵遞送到，打開瀏覽一番，發覺內有一篇報道，指新加坡大興土木，加強建設，但嚴重缺乏海沙，要周圍去買。原來馬來西亞唔肯賣海沙畀新加坡，印尼跟住亦禁運海沙到新加坡，坡人惟有向柬埔寨買入，點知柬埔寨賺咗一筆之後，又話唔制，於是轉向越南，以為一了百了，但越南內部有聲音反對賣沙，話會破壞環境，故此大有可能唔延續供沙合約。去邊度搵呢？緬甸話好嘢，幫襯我地啦，一於要錢唔要沙！嘩，原來買沙買得咁辛苦，香港去邊度買沙呀？打個電話畀建造商人S。建造S話：「只有一條路，向廣東買，但特區政府唔肯出頭同廣東政府傾，我地私人交易畀供應商鍊到暈。」