泛民噚日臨場改劇本，並無喺煲呔讀施政報告時集體離場抗議，將近散場時，八方見到白鴿黨涂謹申有異動，忽然起身行出議事廳，莫非佢唔跟大隊，堅持walkout？
阿涂見到八方時解釋，話真係人有三急先離席，佢話初時諗住忍到完場先去解決，點知忍忍吓真係到咗極限，恐防突破臨界點，同黨友張文、高達商量後，決定都係去廁所一趟好啲。佢話自己已經行得好快好快，出入連埋方便嘅時間，耗時僅兩分鐘左右，點知煲呔仲快過佢，當佢返入議事廳後，發現煲呔已經講完施政報告政改嗰部份，影響咁深遠嘅事，竟然喺佢小便期間草草帶過，諗落都幾欷歔。