施政報告記者會時間好似越來越短，噚日嘅只得40分鐘。新聞處人員好謹慎，記者一嚟到先登記姓名，跟手就有人mark住你坐喺邊。記者會開始，名單即刻交畀負責點名記者發問嘅特首辦新聞統籌專員何安達。
老外問起周勇軍
坐第一行、對正何專員嘅八方同事雖然不停舉手，但何生始終睇唔上眼，其他行家好似《明報》、《信報》都同一命運。去到最後一條問題，何生點咗一位坐得離佢好遠嘅老外記者，呢位無自報傳媒機構名稱嘅記者質問煲呔，香港是否將八九學運領袖周勇軍送返內地。
問題咁敏感，何安達面青，煲呔就面黑，然後好似錄音機咁講番嗰句「不評論個別個案」，然後就話入境處依正法例同手續辦事，持偽證入境者會被送去適當嘅地方。