西貢行善來去匆匆
馮仁昭四圍超：黎明悲嘆愛貓逝世 - 馮仁昭

黎明（Leon）噚日以聯合國兒童基金會大使身份，喺西貢清水灣鄉村俱樂部出席活動。活動未開始，Leon就主動話做訪問先，原來佢完咗活動要趕去睇患咗重病垂危嘅愛貓BaBa，佢好沉重咁話：「因為隻貓腎衰竭，醫生建議安樂死，所以點都要去望一望佢，睇吓仲有冇得救。」
Leon當然唔開心，佢話：「始終都有感情，屋企三隻貓佢係最乖嘅。」相信Leon嘅老婆樂基兒一定同樣好唔開心。Leon仲曾用愛貓嘅名寫咗首同名嘅歌，唱片內嘅相仲有BaBa嘅樣，可見Leon幾咁錫佢。

與司儀拗撬

活動期間，Leon不時講電話，相信佢係問緊BaBa嘅情況，後來馮仁昭知道Leon未去到診所前BaBa已經過咗身，死嗰陣仲冇合埋對眼仔，但當Leon趕到去抱起佢再摸吓，佢就合埋眼好安詳咁喺Leon懷中安息。
另外，噚日大會安排小朋友扮Leon，司儀彭晴問小朋友係咪鍾意咗Leon好耐，Leon就話：「呢啲好難答，佢唔識講中文！」彭晴再問小朋友，Leon再次話小朋友唔識中文，不過最後小朋友都答咗係，彭晴笑笑口話：「都話佢識講中文，你呢排係咪聽得英文多。」言談間Leon同彭晴有啲火藥味。