《鐵拳6》終有突破，家用版雖以街機為基礎移植，但加入劇情模式，邊行邊打，仲可網上合作雙打！近年必備嘅角色換裝方面，亦唔求其男騎呢、女少布，而係搵嚟動漫界殿堂大師嚟設計服裝，其中有《五星物語》的永野護，級數等於Fashion界川久保玲。
文：阿洛
趁佢彈起踩多腳
以08年12月推出嘅街機版為基礎，今次更係正統《鐵拳》系列第一次推出Xbox版，綠營人士都有得撐！講講新「憤怒」系統，體力低於一定程度就變紅，攻擊力大增，係格鬥Game必備反敗為勝法門；特別啲嘅就有「反彈連擊」，當對手浮空時用具備「反彈」屬性嘅招式擊中對方，佢就會彈落地再彈起，又可以好殘忍咁繼續連招，踩多佢一腳！
爆笑劇情破壞環境
家用版重點，一定係劇情模式，3D動作過關玩法，可以用不同角色，打嘍囉再打大佬，單打或雙打合作都冇問題。同時，可以打爛場景嘅嘢，不過正所謂雙拳難敵機關槍，最勁係可以執槍、狼牙棒或火燄噴射器等武器，而喺各關卡更會收集到角色自訂裝扮或強化能力嘅道具，唔使下下隻揪咁悶。
名師襯衫高幾班
除風間仁、三島平八及三島一八等34名街機舊角色外，更會有6位以上新色角參戰，有用八極拳嘅o靚仔，又有古代暗殺女戰士、仲有鬥牛勇士等。現代格鬥玩到冇嘢好玩，換衫係必備元素，《鐵拳6》就勁到搵嚟永野護、CLAMP、岸本齊史等名人幫角色設計新服裝！亦可以依照個人喜好，設計擁有唔同髮型、外表、配件、刺青嘅角色，到時相信網上又會有好多Cosplay人物出現！
Profile
遊戲：《鐵拳6》
機種：PS3、Xbox360
製作廠商：NamcoBandaiGames
類型：動作
人數：1人-2人
推出日期：10月27日
售價：未定
