世界盃外圍賽南美洲區周三展開最後一個直接出線爭奪戰，由烏拉圭主場對阿根廷；兩軍上仗均險勝，但明顯烏拉圭表現較佳，平手盤當然捧後上的「烏圭」成功衝線。（球賽編號：星期三30；有線61台明日6:00am直播）牽牛
烏拉圭上仗憑科蘭補時階段射入12碼，作客以2:1反勝厄瓜多爾，保持爭取第4位直接出線機會；眾將狀態亦佳，一對前鋒科蘭及蘇亞雷斯大勇，中後場亦有加根奴、馬田卡沙利斯等外流兵壓陣。
主隊對賽往績佳
贏波即可穩得第4名的烏拉圭，以蒙特維多卡迪拿拉奧球場上演這場生死戰，據報全場7萬多張門票，已售出逾60,000張，相反阿根廷只有3,000名球迷作客支持，主隊聲勢遠遠壓過阿根廷。事實上，烏拉圭在外圍賽主場表現亦不俗，除大敗予巴西0:4外，其餘7場4勝3和，而主場對阿根廷往績亦不錯，近6次對阿根廷取得3勝3和。
賽前暫列第4的阿根廷，分別比烏拉圭及厄瓜多爾多1及2分，贏波肯定直接出線，和波亦應有第5名附加賽資格；阿根廷上仗對秘魯，上半場排出較保守的4-2-3-1陣式，結果未能攻破秘魯大門，換邊後換入前鋒巴拉莫改打4-4-2，才打破缺口，最終險勝2:1。
當然不得不讚教練馬勒當拿有膽色，3位新徵召球員希古恩、艾馬及巴拉莫均交到功課，但原有主力仍然狀態低迷，今年世界足球先生大熱美斯，被阿國國內傳媒狠批，與隊長馬斯真蘭奴賽後評分均只得3分（10分滿分），為阿國最低分球員。而預期老馬作客烏拉圭，會再以較保守的4-2-3-1應戰，甚至以停賽復出的華朗取代大勇的艾馬。
阿根廷作客唔掂
而且阿根廷落得外圍賽如斯尷尬的處境，全因作客戰績欠佳，8場作客只得1勝2和5負，除了外圍賽初段擊敗委內瑞拉外，再沒有作客贏波，甚至有大敗予玻利維亞、厄瓜多爾等劣績；平手盤不宜再追輸怕人的阿根廷。
星期三30
烏拉圭vs阿根廷 2：1
半全場：和/主
盤口：平手
讓球：烏拉圭
《花絮》
科蘭女友幫邊隊？
烏拉圭前鋒科蘭現任模特女友娜拉（ZairaNara、左）來頭唔嘢少，佢就係馬勒當拿前女友（WandaNara、右）嘅妹妹，佢日前就喺西班牙情色雜誌《interviu》嘅「最美麗西甲女人」選舉，力壓所有西甲球員嘅女友、老婆贏咗冠軍，真係巴閉，之不過娜拉國籍係阿根廷，唔知佢屆時會支持男友，定係祖國呢？
秘魯「黑客」寸爆老馬
阿根廷喺上周六嘅世盃外贏咗秘魯，保住直接出線希望之餘，亦搞到秘魯鐵定係南美區嘅榜尾，此舉搞到秘魯「粉絲」異常不滿，更化身為「黑客」入侵馬勒當拿嘅官網，擺咗一幅老馬痛哭照片，下面則為全部秘魯球員為你默哀，最勁嘅係「黑客」仲擺咗一幅老馬吸毒漫畫，認真唔畀面！
「波霸」全裸撐阿國
「波霸」畫人體繪畫撐阿根廷！阿根廷籍嘅「波霸」美女弗露（MonicaFarro）喺大戰前接受西班牙《奧萊報》訪問時，就話為咗睇波投入、撐阿根廷贏，喺身上畫咗兩國嘅彩色國旗喺身上，攝影師見到佢勁爆身材都忍唔住「嘩！」咗一聲，佢喺胸至腹間畫咗烏拉圭國旗，背面就畫咗阿根廷國旗，咁樣為國出力又可博宣傳，真係醒目！