莎莎郭大手筆，懂宣傳，過往每季之婦女銀袋賽，因有禮品贈送予入場觀眾，已經好有吸引力，非馬迷都爭相入場，今年沙田跑馬地合計，有八萬人之多。自莎莎贊助婦女銀袋賽日之後，加強宣傳，搵好多模特兒戴帽入場吸引男女觀看，同時推廣賽日戴帽，於是不少女士戴靚帽入場，此日在董事廂房碰到梁太，穿粉紅色衫裙，頭戴一頂特別設計嘅粉紅色小帽，搞到左丁山要對梁太講一聲：「我對你有好感！」梁太大人有大量，o架o架笑而去。
主人家K太對左丁山講：「以前女士覺得俾人睇多兩眼，就覺得自己有吸引力，好高興，現在世界變咯，你睇多靚女兩眼，因住俾人話性騷擾！阿甘夠無謂啦，咁小嘅事都煩親立法會尊貴的議員，乜啲議員冇治港大事做咩？」原來除咗講馬之外，應酬有兩大話題，第一就係阿甘活劇，第二就係老人癡呆，個個睇完電視訪問高錕教授夫婦，都為高教授心酸，為高夫人擔憂，覺得佢兩位最好回港居住，請一兩個家傭內外照顧高教授，免得高夫人身心俱疲。
咁究竟老人癡呆可否預防，因高教授染上此病，全城長者或五十歲以上者，群相討論。打麻將是否真係有用？刨馬是否有幫助？吃甚麼健康食品有用，還是各安天命，當係前生註定？
未有肯定科學答案之前，唯有樣樣試齊，記得跑馬前一日，在凱旋廳遇上李校長，同佢講起高校長，於是問佢：「高校長仲有無得醫？」李校長搖搖頭話：「一旦患上癡呆症，就無法子咯，呢方面目前尚無醫學突破。」醒起有人話食銀杏（白果）有用，於是問李校長：「食白果得唔得呢？」李校長哈哈大笑，指住太太話：「佢每日要我食兩粒。嗱！銀杏精華到處有售，好難講邊隻牌子最好，你要控制食量，睇清楚說明，有毒o架，一日不可吞吃超過四粒！」既然如此，睇怕食白果可能冇乜蝕底啩？老婆每個周末煲腐竹白果雞蛋糖水，幾有益噃，啲白果仲幾好食㖭。食得多係有毒嘅，沙田陳太曾經猛話好食，一晚食咗四十粒，半個鐘頭後就成個人暈咗，嚇親陳生，好彩後來醒番冇事啫。