香港連續3個月通縮，但係啲嘢就越嚟越貴，好似我求大俠周不時會幫襯嘅M字頭外國快餐店咁，仲賤到陰啲陰啲咁加價，食個魚柳包餐都要成25蚊，真係人都癲。至於茶餐廳一樣咁貴，食個早餐閒閒哋廿幾三十蚊，食晏仲貴，冇三、四十蚊都唔使旨意出門口。
賠率懸殊熱得誇張
正因為百物騰貴，所以唔少人都好似我求大俠咁，會搵足智彩想幫補吓，諗住執番一百幾十食餐飯都好。之但係，今晚啲世盃外歐洲區賽事認真唔好買，強隊單W熱到唔係路，就算將希臘、斯洛文尼亞同葡萄牙串埋做3串1，竟得嗰1.025倍，點買？
今晚啲世盃外歐洲區比賽，好多場都係屬於強弱懸殊，好似同屬第6組嘅英格蘭（主對白俄羅斯），同烏克蘭（客對安道爾），單W分別得1.15倍同埋1.02倍。
不過咁都未算誇張，好似希臘主場對盧森堡，同斯洛文尼亞作客聖馬力諾呢兩場波，希臘同斯洛文尼亞個W都係得1.01倍。葡萄牙仲離譜，主場對馬耳他單W居然係1.005倍！就算將希臘、斯洛文尼亞同葡萄牙串埋一齊過關，買1,000蚊都係啱啱夠食魚柳包餐；若然買一嚿水，賺番嚟嗰兩個半，衰到連買個菠蘿包都唔夠錢，但斷一關就……。
講真，歐洲區大局已定，大多屬無關痛癢賽事，就算有得爭都只不過係爭次名，而且局勢都好明朗；好似葡萄牙同埋烏克蘭咁，一贏就肯定次名。
留力睇烏、阿戰好過
基於歐洲區啲波咁唔好睇兼咁唔好賭，我求大俠就建議大家早啲瞓、留番啲彈藥，聽朝6點起睇烏拉圭主場對阿根廷呢場南美洲區生死大戰；若然信本報嘅當「弗」名家牽牛，不妨支持吓「烏圭」。場波打完都係8點未夠，若然返9點兼公司唔係離屋企太遠，仲應該唔會遲到。若然好似我求大俠咁返晏，梗係攤落床再瞓過啦！
熱爆歐陸茶餐3串1
星期三9希臘W（1.01）x
星期三20斯洛文尼亞W（1.01）x
星期三23葡萄牙W（1.005）3x1@$100
全中賠率：1.025倍
預計派彩：$102.5