瑞典上周六喺世盃外0:1輸俾丹麥，決賽周9成9冇佢哋份，做球迷嘅，睇唔到巨星伊巴謙莫域嘅風采，肯定係一大損失。其實伊巴真係好鬼有魅力，呢位喺10月3號度過28歲生日嘅瑞典射手，季前先啱啱加盟巴塞隆拿，但已即時拉高咗魯營嘅入場人數，頭6周西甲平均有74,254名觀眾入場，較去季同期多咗12,256人，伊巴果然魅力驚人！
拉高魯營入座率
西甲直播問題仲未搞得掂，球迷除咗喺歐聯睇過伊巴嘅演出，或者網上睇唔多暢順嘅畫面外，喺世盃外睇瑞典直播，都可以欣賞到伊巴嘅風采。只可惜，瑞典極大機會俾葡萄牙霸咗次席資格，睇嚟決賽周都冇伊巴睇。至於瑞典老將軒歷拿臣都公開話，周三對阿爾巴尼亞將會係佢最後一場國際賽，就算入到決賽周都唔會再踢，又係另一個遺憾。
巴塞今季暫喺聯賽6戰全勝，轟入5球嘅伊巴肯定係其一功臣。再睇番近年開季6周嘅平均入場人數，上季有伊度奧壓陣都只得61,998人；伊巴嘅腳法華麗過伊度奧多多聲，球迷自然想現場欣賞佢嘅表演。伊巴加盟之後，直接拉高咗魯營嘅入座率到74,254人，證明佢嘅魅力吸引到球迷破費入場，又幫到手增加埋球會嘅收入，呢單轉會真係相當成功！
西甲冇得睇世盃又冇份
不過伊巴又唔使囂張住，事關近年入座率最勁嗰季，就係球王美斯正式上位嘅07/08球季。據統計指出，當年首6周魯營嘅平均入場人數為82,002人，咁嘅情況，就好似美斯仔同伊巴講：「我先係巴塞嘅大佬！」嚟緊瑞典最後一場對阿爾巴尼亞嘅世盃外，睇怕正規電視台都唔會有直播；大家想一睹伊巴嘅風采，我求大俠只能夠講，要留番睇西甲或歐聯咯。