聽日施政報告，按照煲呔嘅老土作風，例必講吓十．一去北京見到國家幾咁強大，佢幾咁激動之類，但就一定唔會再提香港嗰架爛鬼花車。不過，唔提唔代表件事就咁算，有網民爆料，質疑架嘢唔止300萬，仲話香港曾經提出用馬同白海豚做主題，都畀北京方面ban咗，最終要由北京政府推薦嘅公司幫拖先過關，真係內幕重重。
喺「獨立媒體」網站撰文嘅hevdevil話，佢有個大陸朋友參與十．一花車設計，聽到港府話用300幾萬整架花車，反應係「哈，這肯定是玩弄數字遊戲。」佢解釋，今年啲花車造價由600萬至3,000萬不等。安徽省話佢哋架花車最平，600萬；貴州省咁鬼窮，但就整咗架3,000萬嘅花車。
迎合內地 進退失據
網友繼續爆料，話香港架花車初時交畀一間外判香港公司設計，而唔係好似其他省市咁，搵北京幾間指定公司搞。可能因為咁，過程同北京當局產生唔少衝突。好似話最初設計意念係隻馬，但負責評審嘅北京官員話，唔好搞啲同賭有關嘅嘢。後來改做中華白海豚啦，又話白海豚唔係你香港獨有o架噃。最後多番修改，由北京政府推薦嘅一間專搞國慶花車嘅公司幫手，設計先獲得通過。
仲有，架嘢播放劉偉強執導嘅《我們走過的歲月》同杜琪峰嘅《永遠盛開的紫荊花》短片，但片段中嘅領導人畫面又話要cut咗佢，因為除咗中央指定嘅花車，其他花車唔准有領導人影像咁無大無細。
中央又規定，花車唔准高過四米，四米以上要用油壓裝置。所有地方政府都「上有政策，下有對策」，個個唔理咁多，爭相將架花車有咁勁整咁勁。可憐我哋嘅駐京辦，到組裝花車時，先發現得香港嗰架四米高，比其他省市嘅矮咗一截，惟有臨時趕製鬚刨形IFC加上去，鬼咁核突。
如果hevdevil講嘅係事實，就反映兩大問題。第一，八方唔敢斷言其他地方政府過程中有冇貪污，但hevdevil話，淨係北京幾間供應高級鋼架嘅公司今次賺到盤滿缽滿。照計嗰啲國家指定公司唔會特別優待香港，究竟今次使咗幾多寃枉錢，值得深思。
第二，學hevdevil話齋，事件反映港府一旦要同中央以至其他地方政府互動，往往進退失據。你可以笑港府唔了解國情，唔熟習大陸官場嘅潛規則，亦可以慨嘆香港為咗迎合內地，往往喪失自己。
政府發言人回應話，香港花車嘅設計概念由專業公司提供，融合咗特區政府意見同參考咗主辦單位專家意見，確定設計後先開始製作，設計及製作費總額約為330萬元。
mailto:[email protected]