網隊前鋒易建聯（右）成日俾人話佢太soft（軟弱），估唔到佢喺周一網隊作客93:100負塞爾特人嘅熱身賽，就同出晒名搏命嘅綠軍前鋒加尼特（KG）喺第1節爭位，雙方更發生身體碰撞；當時球證立即將佢哋分開，但KG就撞咗阿聯一嘢。中美雙方嘅傳媒對呢件事有唔同嘅睇法，ESPN以KG係「Mr.Intensity」（肉緊先生）作為佢過激行為嘅解釋；《新浪網》就話阿聯終於表現出強硬一面，全場獲20分及8個籃板，更加勁過只攻入12分嘅KG。我求大俠平心而論，KG今次確實激咗少少，之不過單憑熱身賽表現就話阿聯勁過KG，又有幾值得高興？