內地最近再刮左風，連中共太子黨薄熙來都左魂上身，唱紅歌、講紅古，令唔少人作嘔，點知香港太子黨都盲目跟風，不能倖免。
噚日，唐唐喺上海出席世博會園區香港館結構完工儀式，致辭時竟然模仿共產黨八股文式嘅用語。佢一開波先擦阿爺鞋，大讚60周年國慶盛典「場面宏大、激動人心」、「讓世界對中華民族復興留下深刻難忘印象」。講到世博香港館工程，唐唐又話各個展館工程正「熱火朝天」咁展開，大家「爭分奪秒」，迎接世博開幕。佢仲話，三個月前香港館完成地基工程，經過三個月「艱苦奮鬥」，香港館主題結構「矗立在鮮紅的中國館一側，正等待着披上亮麗的新裝」。
令人側目
唐唐呢篇演辭唔知係邊位文膽操刀？話就話要中港融合啫，但搞到講開「屌屌fing」、「衫碌拎」呢類潮語嘅唐唐一改語言風格，就真係令人側目。睇嚟要由寫《中文解毒》嘅陳雲睇吓，究竟唐唐呢篇嘢中嘅「左毒」有幾深？仲有冇得救？