熊黛林（Lynn）撼低情敵王秀琳（Mango）成功「攻城」，喺日前飛去泰國曼谷同郭富城慶祝自己29歲生日。前日Lynn同城城前後腳返港，有愛情滋潤嘅Lynn好似啲將軍打勝仗凱旋回歸咁笑面迎人，雖然城城依然未肯確認Lynn嘅「城嫂」地位，但Lynn噚日開工時心情依然咁靚，完全冇受影響。
笑笑口心情靚
噚日下晝2點半，Lynn喺助手陪同下離開大坑道寓所，束起馬尾嘅佢，戴住副黑超同薄施脂粉，見到有記者等佢時都好有禮貌咁揮手微笑打招呼。Lynn跟住坐七人車去咗銅鑼灣嘅新唐大廈，問佢搞乜東東時，佢就話：「做嘢。」半個鐘後，啱啱簽咗畀熊黛林間Style模特兒公司嘅何傲兒亦都嚟到，問佢究竟有乜嘢做，佢故作神秘咁話：「機密，唔講得。」
到下晝4點半，Lynn終於做完嘢離開，馮仁昭問佢對於城城仲未肯承認佢女友身份點睇，Lynn好細聲咁講咗句：「由佢囉。」跟住笑笑口揮手講拜拜，然後坐七人車返番屋企。