男人五十，係咪人人都例牌中年發福兼夾中央肥胖？好似54歲嘅法國總統薩爾科齊咁，一係靠電腦效果或者餓到暈低嘅方式，至可以搣走個士啤胎。不過亦有例外嘅，59歲嘅俄羅斯總理普京，佢一身肌肉就令好多後生仔自嘆不如。睇番本地，行年55歲嘅懲教署一哥郭亮明，身形亦fit到漏，肚腩仔唔多見不特止，原來睇得又打得。
行亡命斜面不改容
紀律部隊出身，郭Sir話除咗經常跑步操練，原來仲報咗名參加下個月嘅樂施毅行者，同三位總懲教主組隊，希望喺30個鐘頭內行完100公里。佢同隊員噚日帶幾位年輕力壯嘅記者同八方睇吓佢哋練兵情況，齊齊由慈雲山沙田坳道行上獅子山講吓行山經。四人組雖然加埋成200幾歲，但身手極為敏捷，喺崎嶇山路行上行落，同後生仔行商場一樣咁氣定神閒，面對亡命斜都面不改容，氣都唔使喘吓，反而因為要等埋一班「嚡嚡」聲喘氣嘅後生仔女，由練山變成行吓停吓睇風景。
原來郭Sir今年係第二次參加毅行者，對上一次係01年，嗰陣佢仲係助理署長，用咗30個鐘頭多少少完成100公里。事隔8年，佢話翻啅皆因唔滿意上次成績，所以特登搵幾位經驗豐富嘅同袍一齊挑戰。
共17隊參加毅行者
郭Sir話行山最緊要帶多啲水，佢噚日就孭咗最少半打冰水同寶礦力上山，佢手足就帶埋生果醫肚。佢哋話雖然少練兵，但每次一行就至少8粒鐘，噚日由獅子山去大帽山，就起碼30公里，由朝早到太陽落山先收工。懲教署原來每年都有員工組成10幾隊人參加毅行者，今年就有17隊，仲加埋一隊年輕囚犯隊同埋支援人員，總數接近100人。
肌肉發達唔等於唔用腦。郭Sir最近都頭痕緊好多囚犯打算司法覆核攞番因犯事被扣假期一事，事緣早排有囚犯提出司法覆核，認為現時嘅紀律聆訊由同一間監獄獄長處理並唔公正，最後勝訴。郭Sir話至少幾十個囚犯打算司法覆核攞番啲假期，佢話懲教署家決定就判決上訴。
mailto:[email protected]