數香港名牌中學，香港同九龍華仁書院一定齊齊上榜，今年係佢哋建校90同85周年大日子，為隆重其事，兩間學校舊年年底就成立籌委會，噚日公佈活動詳情。籌委會委員方永康同八方講，今年嘅慶祝主題係「精誠團結，歷久彌新」，而慶祝活動有三個，頭炮係下星期日校慶步行，由九華出發轉船過海再行去港華，到時舊生煲呔曾會主持開步禮，至於其他著名校友包括孫明揚、林瑞麟、胡定旭、李業廣等，都拍心口話會嚟撐場。
壓軸滙演紅館舉行
到12月13日，兩校會舉行感恩晚宴，喺會展招待1,500個校友同家長，不過嗰日撞正東亞運閉幕，希望唔會太受影響。至於壓軸嘅就係出年7月10日，喺紅館搞一場大型校慶滙演，方永康話到時歌舞書法武術乜都有得睇，明星校友李克勤、鄭嘉穎等，亦會表演助興。
幾位名人校友噚日亦有現身，教院校長張炳良話，佢69年畢業正是學校成立50周年，當時有份出版校刊，估唔到轉眼就90周年。另一位九華舊生、有線主席吳天海就話，當年佢小學升班試考全港50名內，結果去到學校考試就有50人考得好過佢，認真高手林立，唔可以隨便認叻。