鏡頭搞搞震 平民扮大導

鏡頭搞搞震 平民扮大導

好多相機同手機都有拍片功能,玩家們閒時拍吓片與朋友分享的確一樂也,不過好多時影片畫質認真麻麻,其實想當「大導演」都唔一定要大投資,JVC新出嘅高清攝錄機GZ-HM400,就有齊好多專業級攝錄機功能,加上全高清畫質,交足貨之餘,都仍然係萬元樓下有交易,係一部平民級嘅專業攝錄機。

記者:許福合
攝影:梁細權
Model:Sansu@PureModels

無插值輸出

今次JVC出新機,有個特別之處,佢叫做GZ-HM400數碼攝錄相機,從外形睇明顯係部攝錄機,但偏偏要叫佢做相機,可以見到對影相功能份外有信心。原因係此機使用1,030萬像素1/2.33CMOS,除咗可輸出到全高清影片外,最勁係可以無插值方式拍攝900萬像素相片,要知道好多手提攝錄機雖然有攝影功能,但要用插值拉大而成嘅相片,相質自然唔多合格。GZ-HM400相質可以追上數碼相機嘅同時,鏡頭用上支大口徑46mmKONICAMINOLTA鏡頭,有10倍光學變焦,同時會使用一個新光學防震系統OIS,組件設於鏡頭入口位,機身晃動時會持續進行校正,留意鏡頭就會見到,都幾特別o架!

■人臉對焦功能,最多可感應16張面孔。

■轉去手動模式後,多功能轉盤就可調整光暗及對焦。

■搖晃機身時,會見到鏡頭內OIS組件震動。

■咁強調影相功能,當然唔少得可當作快門嘅Snapshot鍵。

雙記憶儲存

講起拍高清片,對記憶容量自然特別高啲,今次GZ-HM400當使用高清格式拍攝時,會使用AVCHD格式,檔案體積比較大,所以機身就內置有32GB記憶體,唔夠用仲可以加張32GBSD/SDHC卡,加埋成64GB,可以拍到5、6個小時嘅高清片。留意快門鍵旁邊有專業機才有嘅功能,如光圈先決、快門先決及可讓用家自訂嘅用家先決,拍攝時可更方便地按需要同場地而選擇。而聲音方面更首次加入一向應用在高階音響嘅K2技術,聲音收錄及壓縮後,仍有大部份原音嘅水準,重播時現場感就更佳。其他實用功能仲包括15fps拍攝900萬像相片、高速錄影、同時攝錄及影相等,揸住佢扮導演完全無問題。

■A、S同U分別代表光圈先決、快門先決及用家先決。

■屏幕旁邊有雷射觸控,可作用縮放及Menu選單操作。

■當拉開屏幕,會自動打開鏡頭蓋及開機。

■高速錄影最高可以500fps拍攝,睇番時就有如慢動作一樣。

試相

雖然GZ-HM400係攝錄機,不過相片認真唔錯,值得睇睇。

■無插值嘅900萬像素相片,無狗牙又少Noise,幾滑淨。

■拍片中途快拍,雖然只有530萬像素,相質都可保持水準。

JVCGZ-HM400Profile

影片格式:AVCHDMPEG4AVC/H.264
相片格式:JPEG
影像感應器:1/2.33"1,030萬像素CMOS
光學變焦:10倍
攝錄模式:1,920×1,080i
屏幕:2.8"
記憶:內置32GB+最高32GBSD/SDHC
體積:67×72×141mm
重量:485g
查詢:JVC(27328220)

同場加映CU-VS100播片機

用GZ-HM400拍咗咁多片,梗係想即刻喺電視睇番,除咗直駁電視外,亦可使用播片機播放。不過現時好多播片機都未能全面支援AVCHD格式,而JVCCU-VS100在播放AVCHD完全可應付自如,而且同時可對應其他格式,如MPEG2、MPEG4、MP3/WAV、JPEG等。機身上設有雙SD卡槽,插入記憶卡即可播放,而且仲可以卡過卡!