上周六世盃外睇到我求大俠目不暇給，講到印象深刻，首推烏克蘭主場對英格蘭呢場歐洲區第6組外圍賽；因睇見曾叱咤球壇嘅烏國前鋒舒夫真高「軍刀」變「膠刀」，主射12碼宴客，都幾欷歔。不過，烏國最後都贏1:0「皆大歡喜」，證明「有膠刀、冇問題」啦！
12碼宴客幸隊友爭氣
舒夫真高自從由AC米蘭轉會車路士，再到今夏被車仔放棄重返基輔戴拿模，唔少球迷都覺得佢走下坡，就算佢離開車仔時口口聲聲話要重振聲威，人哋都係當佢講笑。點知佢又真係唔爭氣，代表球會喺歐聯表現麻麻，喺上周六代表國家隊鬥英格蘭，隊友米列夫斯基明益佢，喺13分鐘博到個12碼畀佢主射，點知都要中柱唔入，搞到「畸寶」個旁述「膠刀」前「膠刀」後咁叫佢，認真失威。好彩，最後烏克蘭都憑尼沙蘭高嘅射門省中艾殊利高爾、改變方向而射入，小勝1:0，仲以18分升上次席，以1分壓倒克羅地亞；烏克蘭最後一場分組賽只係作客弱旅安道爾，極有可能以小組次名踢出線附加賽。
話時話，場波除咗「膠刀」廢，英格蘭中堅里奧費迪南亦好屎，球隊輸嗰球12碼，就係因為佢追追吓波突然縮開，搞到門將羅拔格連要出迎侵犯米列夫斯基，被罰出場兼輸極刑，下場要停賽（英格蘭於是補選咗賓科士打）；而英格蘭以全勝出線嘅希望，亦因此幻滅。
英軍向克國報復？
不過，有陰謀論者叫我求大俠唔好咁勞氣，皆因英格蘭喺08歐國盃外圍賽對克羅地亞時，只要打和當時已出線嘅克國，就可以晉級，點知克國嚟真，英格蘭輸2:3兼出局。今次兩國又同組踢世盃外，已出線嘅英格蘭絕對有可能放水畀烏克蘭，等佢哋超前克羅地亞。
諗落似層層，因為英軍領隊卡比路賽後一啲都唔勞氣，仲話：「我哋隊波打得唔錯，特別係下半場踢得更好，我為麾下球員嘅表現感到驕傲！」
