抱狗擋餅女是非
馮仁昭四圍超：Miki難辨Theresa真假 - 馮仁昭

朱茵、楊愛瑾（Miki）、羅寶文、阮小儀，噚日帶埋自己嘅寵物去到上水為香港犬隻工作及障礙賽事會出席「Kiehl's狗狗與您『印』出健力士世界紀錄」活動。全場最巴閉係羅寶文，佢出動三個工人加兩個保鑣照顧帶嚟嘅8隻貴婦狗，狗仔去到邊保鑣同工人就跟到邊，仲矜貴過人。
Miki全程抱住只得6個月大Poodle狗Toffee，因為太細粒，所以唔敢放落地，幾乎抱到手軟。Miki對於Cookies姊妹傅穎（Theresa）近日同金牌大風嘅合約糾紛，佢話：「我已經轉咗公司，再不停提舊公司嘅事對我老闆唔公平，亦唔想啲是非影響我嘅新開始，我希望係一個好開始，唔想介入佢哋，我都唔知邊個真邊個假。」

朱茵收埋藏獒犬

雖然朱茵只係帶咗隻6歲大嘅曲架提子到場，並冇帶埋佢同男友阿Paul一齊養超貴身價嘅藏獒犬嚟，但提子個樣夠晒可愛，兼且識得望鏡頭，都好受歡迎。朱茵為咗照顧屋企嗰8隻狗，之前特登走去搵專人教學梳毛，日常清潔同幫狗仔刷牙都係一腳踢。
此外，小儀隻芝娃娃DeeDee條脷永遠伸出嚟唔識收埋，夠晒盞鬼。