議員L邀吃午飯，時間係下午一時半，比較特別，後來回心一諗，議員L要開會，時間難以控制，大家將就吓啦。中午十二點幾，扭開now電視睇立法會會議直播，點知立刻見到議員L發問，後來又聽到一把聲音，好似係肥仔孫噃，但電視畫面真奇怪，鏡頭只係對正議員，其他發言者不見樣貌，只聽到聲音，點解啲鏡頭咁死板o架，攝影師唔識轉角度嘅咩？
呢啲技術問題唔理嘞，只聽到肥仔孫把聲，極力反對最低工資立法，馮檢基就大罵孫先生講歪理。哦，肥仔孫代表獅子山學會，力指最低工資只會加劇青年人嘅失業率（按：15至19歲青年人失業率已高達28.7%），馮檢基就話社會工作唔夠，要保護工人收入。兩位好似搭錯線，各說各話。
一時半，見到議員L，佢係商界議員，代表佢嘅選民利益，自然反對最低工資立法。經濟學家普遍反對最低工資，議員L話政府搵咗三個經濟教授畀意見，代表經濟學術界，自不然係反對嘅。記得另一位議員G曾話過，黃毓民鬼殺咁嘈，罵政府點解唔搵一啲贊成嘅經濟學家畀意見，政府就話搵人之前，毋須設條件，唔通一早講明：反對者不予理會咩。啲贊成派議員好易做嘅啫，以後需要專家意見嘅話，最好邀請社會工作系嘅教授，呢班學者多數贊成最低工資，到時立法會上，雷鼎鳴舌戰社工派，一定好好睇。
議員L話最低工資立法仲有排傾，但如果政府一定要嘅話，實會通過，因為泛社會派議員人數多過商界及專業界議員好多，即係工聯會、民建聯、職工盟、民主黨、街工……加埋社民連、公民黨，數舉手人數，乜都贏晒啦。目前要頂住嘅，只係如何計算工資，及爭取家居女傭不在最低工資法保護之列而已。既然最低工資立法似乎去梗，議員L話只能有咁多做咁多，佢更關心學生吸毒問題，佢自己捐款辦學，經常到學校視察，知道學生索K問題十分嚴重，認為自願驗毒係一個方法，但各方為此爭論不休，都唔知幾時可以真正落實。