「出事o架嘛！」《怪談》裏司徒法正金句，講到101次，開始乏味。
不如講吓人生。由母親跟胞姊湊大，做的士牌炒家炒到要走佬，妻子二話不說撐起頭家；做過夜總會睇場，窮到要靠媽媽生資助開風水店，五窮六絕到今日成為風水界大紅人，司徒法正說他算到。
人生是由一座山到另一座山，沒有一座山是沒有頂峯，問題是如何在山與山之間走得穩，司徒法正說。人生道理領悟多少各自修行，越寫越覺得，這篇訪問的主角不是司徒法正，而是他背後的女人。 撰文：吳佩思
家庭篇
七星伴月
時代：47年至70年代
背景：香港
在女人堆長大的司徒法正，「爸爸」這個名詞，非常陌生。播完種就遠走加拿大，是媽媽和七個姐姐湊大他，難怪他享受錫女人與被女人錫的互動關係，可惜愛情史非常乏善可陳，才初戀已經踏進婚姻。
細細個我爸爸就去咗加拿大，只係媽媽湊大我哋。媽媽冇乜受過教育，字都唔識兩個，不過好嚴格，郁吓就打餐死。
我一路未見過我爸爸，媽媽又冇乜講爸爸去咗邊，爸爸成日都有寄信同相返嚟，叫做見過佢囉。17、18歲左右爸爸就死咗，我都唔識喊，因為我同佢冇感情。我有七個家姐，自細俾家姐錫到大，可以話喺女人堆大，縱慣晒，到十幾歲瞓覺仲同我掃背脊。
初戀訂終身
我又冇乜嘢話拍拖，十零歲邊識乜嘢愛情呢？加上啲家姐湊大我，變咗我對女人冇乜嘢野心，只係當佢哋好friendly、好好朋友咁，就算有女仔冧我，我都唔識俾佢點冧，咁佢對我好好，我咪對佢好好囉。
細個參加過童子軍，有次喺麥花臣球場識咗個義工，大家傾吓偈，又傾得幾好，咪一路見面囉。到21歲嗰年我媽媽要移民去美國，佢臨走前話，喂你哋行得幾好喎，不如幫你同佢講啦，咁咪結婚囉。
其實我好錫女人，我又好鍾意女人錫我。有時我覺得我幾大男人主義，我唔鍾意老婆管我，自細都唔鍾意人哋管我，所以一路落嚟都係佢做番佢嘅嘢，我做番男人應該做嘅嘢。
簽卡洩行蹤
我33歲咁上下、七幾年啦，嗰陣炒的士牌，好搵錢o架，當時出一張信用卡唔係簡單，滙豐出咗張信用卡畀我，個經理話，喂，你出咗張卡，不如帶你去威吓啦，我話好呀，結果去咗佐敦道嘅東方舞廳。埋單就簽卡啦，顯示吓身份啦，叫我簽，我唔知原來信用卡啲單會寄番屋企，咁俾老婆知道，嘈咗一次交，咁我以後就知喇，唔好俾佢咁簽法，死人o架！
事業篇
一鋪清袋
時代：70年代末至80年代初
背景：由香港到菲律賓
沒有爸爸，司徒法正更想做個好爸爸。這位風水師前身是全職炒家，一鋪被港英政府打殘，為免坐牢，隻身避走菲律賓，足有五年，司徒法正說，好痛苦。
我最搵錢係做的士嗰陣，應該係79年，當時我專炒的士牌，本來一年就出300個，後嚟簽署中英聯合聲明之後，英國政府癲起上嚟一個月出300個。嗰陣我揸住過百架新界的士，嗰陣新界的士1,000蚊個牌照都俾人投咗出嚟，但本來最低限度都值五六十萬o架！我就死喺嗰度喇，銀行逼倉，但唔畀我破產，因為好多官司纏身，後尾查過我只係經濟嘅問題，咁就要還錢啦。我走得好急，當政府講畀我知單案唔係刑事案，只係民事，跟住第二日我就坐飛機走喇，去咗菲律賓5年，係律師教我嘅，因為嗰時仲有錢債監，如果我唔走佢就拉我坐監喇。
還足三年債
我覺得我最痛苦係嗰段時間，我覺得我係一個大男人，自己失敗應該自己承受番，唔應該影響我家庭，所以我決定離開，而且啲小朋友未大，唔走得，亦都冇錢走。85年我返嚟開始慢慢還番啲債，我諗都有成五六百萬，還咗三年左右。
悟道篇
三星拱照
時代：80年代中
背景：從澳門開始
返港後不甘由低做起，走去澳門做夜總會睇場。窮得連小舖都負擔不起，最後由三位媽媽生合資開設他第一間風水店。
去菲律賓投靠朋友嗰陣，我只係揸住少少現金，仲俾人呃，以貴價買一間冇生意嘅餐廳。其實我好細個已經鍾意玄學，喺菲律賓嗰陣諗到好多嘢，點解由冇錢變有錢，有錢變番冇錢，於是呢5年慢慢去吸收，咁啱嗰邊有啲師傅，得閒冇嘢做就搵佢哋傾吓，慢慢對玄學加深認識。
返到香港之後，我冇乜嘢再做喇，有啲老闆想搵我返去幫手，但我覺得，我做到最高做到最大o架嘛，今時今日我返嚟，要同佢哋打工，我唔想再做番低呀，你叫我做總經理我都唔想去做，冇得翻身嘅。我又冇錢，當時我有個外甥喺澳門開夜總會，佢話不如你嚟幫手啦，我咪過去囉。
同情夜之女
後尾我諗吓，不如搞間風水店賣吓吉祥用品，咪有路諗囉，我又冇錢，但又唔想喺夜總會做，於是我同三個媽咪講，佢哋一句說話都冇講，只係問：你要幾多錢，我話兩三萬得o架喇，於是每人借7,000蚊畀我，我就揸住呢啲錢開檔，呢個恩到今時今日我都好掛住，我司徒法正做到今日嘅地位，如果當日冇佢哋，我冇今日o架。
我覺得仗義多為屠狗輩，好多時夜總會啲人嚟搵我，我都盡力去幫。好多喺大陸嚟嘅女仔叫我幫佢手，等佢哋搵多啲水喉呀。有時我鬧佢哋，我話你哋咁辛苦落嚟，如果你顧住媾仔賭錢嘅，我唔幫你o架，但係你話想搵錢嘅、搵對象或者係搵錢返去光宗耀祖，我話我幫你，佢有冇錢我都幫o架。
刀斬武警內地爆紅
由夜總會睇場變身風水店老闆，司徒法正日日為賭場、夜場的人算命改運，至於他的命運，則由一個胖婦改寫。
風水店平時人迹罕至，有天來了個自稱寧大姐的胖婦，說要算命，兩人一聊就聊上頭，女子還連續來了三天。一日來了一輛Benz，說要接載司徒法正見老闆，一看，原來就是那位闊太──葉劍英的媳婦錢寧戈，還給他引見不少內地高官富商睇風水。
鬼祟睇風水
八十年代之初內地正改革開放，司徒法正看風水也看人，見盡咄咄怪事。「好多書記收工之後搵人車我，嗰陣未開放，佢哋好驚俾人講，咁我只能夠當朋友，閂埋房門，我睇到乜嘢咪講囉，其他人唔知我係風水佬o架。
「第一次去北京，一落車，十幾架Benz泊喺度，個個孭晒啲花嚟接我，啲夥計着晒白色衫嚟等我，仲要齋戒七日，當我活佛咁樣，成世仔都未試過呀！」
達官商賈對司徒法正奉若神明，也有人覺得他是渾世神棍。一次為前公安部部長陶駟駒契仔的夜總會做儀式，司徒法正瞥見十來個便衣武警一臉不屑，於是出招：「我哋有一種叫做刀槍不入嘅修練方法，我話搵人買把刀同錘返嚟，佢哋真係買把豬肉刀，十幾斤重，個錘好大個。我話邊個覺得自己運氣唔好呢，今日請咗關帝嚟，我幫你做啦，你捱我九刀，男嘅斬三下個肚、每邊心口斬三下，仲要俾錘仆o架喎，女嘅就割隻手。
「你哋覺得我呃人，我就做啲嘢畀你睇囉！冇人敢出嚟，後尾有個女人出嚟試，當時天氣好凍，佢有啲手毛，我斬落去嘅時候，啲毛卡卡咁響，咦，又冇事喎，於是開始排隊喇。咁就慘喇，斬咗幾十個人，真係斬到手軟！」
話你知
法科風水小心出事
2000年返港入有線做《怪談》，司徒法正漸建立知名度，龔如心遺產案更令他成功彈起，還想出8,800蚊平民價種生基，包裝手法一流。
風水師名堂五花八門，人稱「鬼王」的司徒法正開邊瓣？他說：「我係法科嘅風水師，以前啲人一聽到『法』字就覺得係牽涉鬼神，唔鼓勵。其實好多出名嘅師傅好似黃震宇、林國雄、李丞責，個個都識法科，亦都有啲係神功弟子，但佢哋唔承認，因為驚俾人話係邪門。」
遇鬼要靠惡
「法科」源出道教，主用精神力量或符咒請動鬼神加運。吓吓「搞鬼」，司徒法正自然護身有法：「去到邊度都好，我都係先禮而後兵，裝晒香做晒嘢，同佢哋講好晒，如果你唔喜歡，我可以走，我唔會搞你，亦唔會承諾任何嘢話幫你。見到鬼最高心法係當睇佢唔到，一係就惡過佢。」
《怪談》金句：「出事o架嘛！」熱爆高登，有網民讚他影帝級演技，司徒法正說：「我冇演技呀，我只係娛樂界比較出位嘅傳媒人，如果我係明星、即係話我做嘅嘢全部都係假o架啦！」由海洋公園到啤酒宣傳，下月又為新加坡金沙賭場拍電影，是出位還是搵錢？「會減低o架喇……因為我係一個娛樂嘅真正師傅嚟o架嘛，不過有時我又覺得應該同大家同樂吓，唔好教佢哋咁迷信囉。」
