對上星期，多隻大價磚頭股再創1年新高，買落後二三線，買莊士機構（367）。莊士最新NAV2.27元，現價0.62元折讓達到73%，重估前嘅折讓，已經吸引到爆。
呢期香江豪宅市場旺到爆，單係尖沙嘴一個新樓盤，每方呎承價講緊3萬蚊。莊士在港揸住嘅資產，絕大部份唔係優質地段嘅投資物業，就係豪宅，莊士呢勻肥仔水。求其搵集團一個物業計吓數，就以香島道37號為例，物業建築面積3.47萬平方呎，係豪宅區，應該無置疑，賬面值以3萬蚊一平方呎計數，單一物業賬面值都10億銀。莊士最新市值得9.4億銀，總市值仲低過單一物業價值，股價殘到痹，物業兼有好大增值空間。有理無理，博莊士翻半番到0.93元，目標價嘅NAV折讓，仍然挨近60%。
力華短炒博升兩成
力寶華潤（156）08年度（12月底止）投資物業係講緊減值2.4億銀，但09年半年度（6月底止），就已經獲投資物業公平增值1.3億銀。同上邊莊士一樣，力華喺中港兩地，一樣揸咗唔少優質投資物業，金融海嘯過後，力華好快享受到磚頭重估增值效應。力華最新NAV0.35元，現價0.156元折讓55%，有唔錯折讓墊底，短打博升兩成到0.187元，未有耐到NAV水位。
錢雋