機身又薄畫質又靚嘅LED背光LCD薄屏電視喺香港慢慢流行，前有韓國三星搶閘推出，近有國產康佳也進場分一杯羮，搞到小妹心郁郁想買部，點知LG早幾日都出咗佢哋首部LED背光嘅LCDTVSL90，想同其他品牌爭長短。
LG電子巿場總監趙遠明話，LED背光LCDTV嘅機身比一般LCD薄好多，畫質又靚好多，好似呢部SL90，機身厚度只有29.3毫米，對比度去到3,000,000：1超高，令影像層次更細緻及鮮明，特別顯示黑色能夠製造深邃嘅視覺效果。
趙遠明話，都知巿場其他牌子已經推出LED背光LCDTV，但SL90配有獨家嘅單層無框邊設計，飛走傳統嘅框邊，令到電視機外面更纖薄輕巧，「好多男士都好想買大電視，但身邊另一半對大畫面好抗拒。但係呢部冇框邊，外形討好，掛喺牆度，好似裝飾品咁，女仔都唔會抗拒買。」小妹現場所見，成個電視好似塊鏡咁，又幾鬼吸引。
趙遠明話，SL90分42吋同47吋兩款，暫未定價錢，「我哋都要睇吓對手出招先。」
電郵：mailto:[email protected]