台灣今年不慶祝雙十，香港親台人士卻如常舉行雙十節升旗儀式，300幾人噚日一早齊集屯門紅樓，熱烈揮動青天白日滿地紅旗，大唱《三民主義歌》。身處現場，情境似曾相識，如幻如真。
同十．一北京萬人空巷相比，紅樓升旗禮真係冇得揮，大會主席麥業成話，雖然中共軍力鼎盛兼外滙儲備豐裕，但司法不彰，又唔民主，十．一唔知有乜值得慶祝。立法會議員陳偉業指十．一典禮上中央領導人好似殭屍咁冇笑容，反觀嚟紅樓嘅人都充滿歡樂，在場市民同時大嗌「自由萬歲」。70歲嘅何伯同八方講，北京閱兵勞民傷財，站起來嘅只係中共而唔係中國人民，佢話雙十先係國慶。
雙十紅樓升旗係多年傳統，香港升旗隊總會唔知攞景定贈興，噚日喺城大舉行升五星旗儀式，慶祝中共建政60年，又宣佈成立全港第一隊幼稚園升旗隊，將升旗禮小兒化。