青少年吸毒問題嚴重，高官如夢初醒慌忙應付，急就章提出校園驗毒遭人批評得體無完膚，近日有人通知八方，有班自稱熱衷禁毒事務人士，上月籌組成立「香港禁毒黨」，政綱獨沽一味講禁毒。
根據八方得到資料，香港禁毒黨近20項政綱，統統都同打擊毒品有關，包括增加人手緝毒、加強教育宣傳，又建議喺港鐵站、碼頭、巴士總站裝設X光機檢視乘客隨身物品，發現藏毒即時法辦，其他有創意措施包括修訂大廈公契，住戶喺單位內吸毒要拉人封屋。
呢個新政黨好騎呢，認為必須有效禁毒後方宜普選，而參加各級議會選舉候選人，都要申報家人有冇毒癮。八方試圖聯絡呢個禁毒黨，但佢哋似乎毒過毒男，唔敢見人冇回音。