有奶便是娘，求票唔怕入骨場。運輸及房屋局局長鄭汝樺噚日撐兩層樓梯，入咗一棟滿佈足浴店嘅舊樓，唔係去按腳，而係去為白鴿黨高達第六個議員辦事處剪綵。
白鴿黨成日同政府對着幹，活動罕見高官捧場，鄭汝樺噚日發言時卻盛讚高達係好勤力、盡責議員，官員同高達合作一直良好，尤其係改善公屋政策，「李議員啲手指模，我哋係見得到嘅。」大紅花轎人抬人，達仔亦好客氣，話自己辦公室掛有「打倒官商勾結」口號，「當中個官字，應該唔係鄭汝樺。」
高達識做派定心丸
局長無事不登三寶殿，高達事後透露，鄭汝樺對公共專業聯盟日前提出另類高鐵方案好緊張，噚日同佢講明，如果白鴿黨同專業聯盟傾完個方案，務必要搵埋運輸局，聽埋官方意見先決定支唔支持局方建議。高達派定心丸畀局長，強調白鴿黨未有傾向，又叫局長應該親身去菜園村同菜園村關注組村民傾吓偈，唔使驚請願示威。
鄭汝樺負責公屋政策，大把籌碼同白鴿黨討價還價，白鴿黨九票，八方相信鄭汝樺就算未袋袋平安，都應該手到拿來