【上月盟主】近期個人心水有啲下滑，上周貼圖盧茲贏1:0，結果開對面波膽，擂台排名又冇之前咁威風，聽賭博界老大哥話「贏谷輸縮」道理，加上國際賽一向唔係大注出擊好時機，注碼縮一縮先。
今次主打推介世盃外中北美洲區外圍賽，美國作客洪都拉斯，平手盤都照撐美國。呢一區一向冇歐洲、南美洲咁亂，由兩隊老大哥美國及墨西哥領導，其他哥斯達黎加、洪都拉斯等爭下腳。當然美國同墨西哥外圍賽開頭都唔係咁醒，只因外圍賽長路漫漫，初段教練都派一啲年輕球員吸收經驗，到比賽中後段要認真，自然可以打番上嚟。
美國贏波可提早出線
目前美國排名榜首，領先第3位嘅洪都拉斯3分，只要今仗贏波，就唔使理最後一周賽事，肯定攞到前3名直接出線決賽周。美國教練巴特利都唔敢輕率，侯活、查理戴維斯、安恩胡等外流兵悉數入選，雖然富咸中場丹普西同屈福特後衞迪美列因傷缺陣，不過侯斯頓戴拿模嘅賀頓近年進步甚快，頂丹普西個中場位唔係問題；保卡尼加移任中堅拍安恩胡，感覺仍然穩健。
洪都拉斯可以講喺中美洲新勢力，近年亦打起柏拉西奧斯及美羅費古羅亞等英超兵，但始終與同區一線隊有距離，之前3場對美國同墨西哥，除咗今年4月趁墨西哥仍由艾歷臣執教，立立亂之際贏3:1外，其餘2場都輸波，平手盤點計都係信美國。
波斯尼亞誓奪「愛」
歐洲區方面，波斯尼亞呢支新勢力，一啲都唔可以忽視；喺第5組屈居西班牙之後，暫到第2絕對唔差，作客無欲無求嘅愛沙尼亞，贏波就一定攞次名，1.4倍客W要得過。
文：牽牛
結餘＄100,477
本金＄100,000（上周賺蝕︰-$2,500）
近5場往績：LWDWW