四川省政府打完齋唔要和尚，明明筆數以十億元計嘅四川賑災撥款係成個立法會批畀佢哋，偏偏邀請議員到當地考察時就玩篩選，難怪令泛民議員眼火爆。
社民連陳偉業噚日喺內務委員會上再次譴責四川省政府冇品之餘，亦唔放過帶隊嘅立法會主席曾鈺成，因為阿曾冇幫議員維護尊嚴，若然下次再有政治審查選擇性邀請，立法會應該一口拒絕。其他泛民議員當然好認同，八方估唔到連金勞詹都忽然泛民化，激過社民連。
下次可投反對票
會上佢兩度大聲疾呼做人一定要有「樽鹽」（佢真係咁講，八方相信應該係講緊尊嚴），事關立法會通過撥款賑災，四川省有乜權揀人去考察？我付鈔，你請客，仲得了！金勞詹聲言政府下次再申請四川賑災撥款時，議員可以考慮投票反對，既然四川唔畀面，議員都毋須客氣，咁唔公平嘅事都唔出聲，枉為議員啦。正當泛民議員拍手叫好之際，金勞詹忽然話，聽日見報率最高一定係佢，唔係毓民。