立法會內務委員會噚日啟動調查甘威事件程序，罷免一個議員好複雜，相信有排搞，未正式調查前，議員先就示愛、求愛、有好感係咪性騷擾展開激辯。呢啲問題唔係咁簡單，冇可能三言兩語說得清楚，一時間議員好似變身戀愛專家，侃侃而談男歡女愛種種問題。
受者感受好緊要
喺大學做教授嘅鼠王芬以過來人口氣話，自己對呢啲事情好有經驗，並非經常有人向佢示愛，而係成日收到涉及性騷擾投訴，處理投訴經驗好豐富咁話。鼠王芬話，工作間男女關係真係要好小心處理，莫講話口頭表示有好感，有時連一個眼神都可能引起大風波！
其他議員同八方一樣譁然，一個眼神都出事嘅話，好誇張啫，好彩甘威已經避席離開議事廳，否則要戴住眼罩開會都似。鼠王芬以專家口脗指出，性騷擾是否成立，其中一個關鍵係受者感受，而男女對所謂性騷擾嘅睇法可能好唔同，所以有啲畸士，可能乜都冇做過、冇講過，都可以構成性騷擾指控。
在場議員對鼠王芬講法不以為然，唔知係咪質疑佢知少少扮代表，毓民反駁佢「shortshort哋」，若然一個眼神都足以構成性騷擾，「你望一望我，都性騷擾緊我啦！」毓民忽然發難，鼠王芬確係好似唔敢望佢，但要求佢收回「shortshort哋」呢句話，毓民懶理。
講到呢啲男女大不同問題，真係幾日幾夜講唔完，葉劉早就修心養性，慨嘆自己無辜捲入桃色漩渦，只不過剛巧佢係申訴部當值議員，硬食接咗個波，先至做咗跟進事件召集人，「我都唔知係幸定不幸」，要處理呢單夾雜感情瓜葛嘅不合理解僱事件好棘手，葉劉個樣十分愁。
各黨派睇定嚟打
甘威事件隨時成為政治風波，各黨派議員暫時十分克制冇窮追猛打，未必係對甘威好，只係恐防他朝君體也相同。有議員私下講，如果立法會要干涉議員道德問題，咁舉中指、爆粗都可能要開快勞跟進，幾時輪到查甘威？因此建制派對事件都冇統一口徑，至少在女主角出場前，要睇清楚事態發展，慢慢開火未遲。
mailto:[email protected]