小藍最近買咗部Netbook，貪佢夠平夠輕，隨時隨地可以上網睇戲，但好唔慣用MousePad，個箭嘴經常飛嚟飛去好鬼死難控制，都會插番隻滑鼠仔嚟用。不過，話明Netbook，梗係帶埋部機周圍去，隻滑鼠遇上光滑嘅枱面都唔多曉郁，碰到係玻璃面仲弊，隻嘢直頭罷工㖭。
可以一拖六
原來唔止小藍有呢個煩惱，就算係生產個人電腦周邊產品Logitech嘅香港區經理Albeta都感同身受，所以三年前公司開始研究喺玻璃都可以運作嘅滑鼠，最近終於研究成功，以嶄新嘅Darkfield雷射追蹤技術，令新一代滑鼠可以喺玻璃、雲石，或者係掃咗光漆嘅木器都用到。
Albeta話，打頭炮嘅兩款超級滑鼠分別係專業型M950（售879元），同埋方便周圍去用家嘅纖巧M905（售639元），「滑鼠仲配合全新嘅Unifying無線技術，每隻滑鼠跟一個微型USBUnifying接收器，插入筆電就可以無線使用滑鼠。」Albeta仲話，接收器特點係佔用一個USB插，就可以連接6個同Unifying技術兼容嘅滑鼠同鍵盤，公司一口氣出咗4款滑鼠同兩款鍵盤，咁就唔怕部筆電唔夠USB插頭啦。