o靚模周秀娜踩入科技大學參與座談會，卻被嶺南大學教授李小良莫名其妙的深奧問題考起，出醜人前，科大為此致電周秀娜方面道歉。周秀娜非但沒有責怪教授，還自嘲是外星人，謙稱肚內墨水不夠多，不明教授所言。若論EQ，周秀娜似乎不比知識分子遜色。
中五畢業的o靚模周秀娜前晚踩進大學校門，應邀到科技大學出席座談會，與嶺南大學教授李小良一起解讀「o靚模」現象。周秀娜原本表現輕鬆，卻被教授的深奧問題弄至口啞啞，如教授忽然拋一句英語問她：「係咪會好極度地享受呢種好intensive、好emotionallyintensive……」周秀娜只能說「好深喎」、「唔係好明」、「你可唔可以問多次」，慘在400名大學生面前出洋相，甚至有報道狠批她答非所問。周秀娜慘成眾人笑柄，但網友普遍怪責教授未有顧及她的學歷。
「我啲墨水唔夠」
周秀娜承認自己無知之餘，更力撐教授，她昨日在電話中說：「最初同教授會面，佢哋係話用我過去幾個月回應傳媒嘅金句去分析社會現象，啲point好有趣，我參加演講前係朝住呢啲方向去思考，可惜最終因時間關係，一樣都冇討論到。我最初聽教授嘅典故，真係聽到頭暈，嗰刻覺得幾深，可能教授忘記咗我唔係佢學生，又或者我肚裏邊啲墨水真係唔夠。」
對於被指答非所問，周秀娜更抵死的說：「我忽然認同莊思敏話我係外星人俾人解剖，或者我真係外星人，所以唔理解地球話。」對於o靚模冇腦的指摘，周秀娜力撐：「我嘅工作係娛樂圈游走生物，我清晰明白自己冇嘢可以直接教到學生，反而呢次就令我學到嘢。」她更乘機自勉說：「無論學生或藝人都應該增值自己，有機會我都想去讀大學。」
Janice唔敢演講
科大方面昨日主動致電周秀娜致歉，她的經理人Roy昨日在電話中說：「係呀，我哋冇唔開心。」可覺李小良的問題有意刁難周秀娜？Roy說：「可能現場太多記者，閃燈閃到教授頭暈，搞到佢唔記得要討論啲乜啩！」
周秀娜勁敵的文詠珊（JaniceMan）昨到柴灣工作，她揶揄說：「冇諗過會講talk，要做好多功課，言談技巧表達樣樣都要改善，但從事模特兒工作唔會突然去做講座，分享做模特兒心得當然願意，但如果係工作以外嘅就會有困難。」
近日在舞台劇扮o靚模的詹端文（詹Sir）昨日在灣仔宣傳，他透露會將周秀娜這次座談內容作舞台劇題材，他說：「o靚模最主要就係無知，當遇到唔識答嘅問題時，應該係答『乜嚟o架』，唔係叫人問多次或者講唔識答囉。」
採訪、攝影：比華利、胡比、馬建華
