「殼王」陳國強幕後控股嘅漢傳媒（491）最新年報噚日出爐，執行董事王日祥（即係王晶導演，圖）逆市加薪，截至6月底止全年人工有223.2萬港紙，按年增長3.24%，即係每個月18.6萬銀。之但係王晶今年6月8日已經辭任董事總經理一職，只保留執董職銜，工作範圍細咗，唔知出年人工使唔使減嘞。
轉戲路攞獎值回票價
今次加人工，華華覺得都算值回票價嘅，點解？皆因拍開市井片嘅王晶，舊年一改戲路，先以小本炮製電影《天水圍的日與夜》，喺舊年第28屆香港電影金像獎獲得6項提名，最後更勇奪最佳導演、最佳女主角、最佳女配角及最佳編劇四項大獎，而其後佢再出擊比較有深度講廉署嘅《金錢帝國》都算有口碑，而旗下歌手狄易達同o靚模賈曉晨都算有人氣，公司雖繼續蝕錢，但至少形象算唔錯啦，王晶都應記一功嘅。
至於啱啱今個月因健康理由而辭任主席兼執董嘅余錦基，佢09年度年薪就維持不變，都係120萬元。