日本漫畫《龍珠》有位奸角叫魔導師巴菲迪，佢嘅魔法甚至可控制魔人布歐；法國教頭杜明尼治一向極級迷信，但補選嘅巴菲迪比高美斯並唔係「巴菲迪」，佢唔識魔法救國之餘，原來仲係個病壞。呢位里昂前鋒，周三喺國家隊操練中突然暈低嚇死班隊友，杜明尼治係神算都計唔到高美斯有此一着，法國入唔入到世盃決賽周，靠實力好過啦！
里昂首席射手幾fit
杜明尼治出晒名對星相學好有研究，之前爆出佢唔會選天蠍座嘅球員入國家隊，驚影響球隊成績喎。哼，我求大俠不嬲對呢啲咁迷信嘅人好反感，堂堂一個國家嘅主帥，竟然成個婆仔咁冇啲大志。
話說列貝利因膝傷退隊，哥古夫又養緊傷，搞到法國冇晒創造型球員。家陣法國喺世盃外第7組排緊次席（15分），要反壓榜首塞爾維亞（19分）直接出線決賽周可謂難過登天。於是杜明尼治補選咗巴菲迪比高美斯入隊，諗住貪佢季初喺里昂幾fit，暫入4球做緊球隊首席射手；而之前4次代表國家隊，都有兩球進賬。
反晒白眼搶救後無礙
點知杜明尼治千算萬算，夾晒時辰八字都出事。高美斯周三喺球隊對抗賽中，踢咗10分鐘突然暈低，仲反晒白眼郁都唔郁！近年球員猝死事件多不勝數，法國隊友都即時走去睇吓高美斯發生咩事；片段所見亨利、賓施馬、艾拉等人衝晒埋去圍住高美斯，但後者仍然冇知覺。
好彩經隊醫搶救後，高美斯終於起身步出球場，聽講佢休息咗一陣就再返球場操練，見到佢就牙煙。其實高美斯獲徵召前一個禮拜，喺里昂操練時都試過暈低，唔通有暗病？講真吖，球員都係人，為踢波使乜咁博？高美斯，命仔緊要呀！不過話時話，杜明尼治不嬲揀人好小心，乜今次揀件病壞呀？唔通你啲占卜命理失準乎？