港交所（388）禮拜一推出中港各三間免費即時報價網站，但中標條件一直未見披露，有入表但落選嘅報價商星光財經當然扯火，市場培訓總監馬麗娜（Pauline，圖）前日喺報章撰文發炮，批評遴選機制唔透明又唔公平，更有客戶問佢點解唔係所有財經網都免費即時報價，睇大利市機係咪唔使畀錢。
質疑經驗淺都奪標
Pauline話，文章一出街，港交所傳訊部噚日朝早連電兩次解畫，指挑選網站準則不外乎四項，除咗網站瀏覽量要多，要對市場有專業認識，要發揮推廣港股效應，同埋要有滿足投資者嘅資訊。Pauline聽完後覺得仍有疑問，佢話中標者之中，都唔係間間都咁老經驗啦。
至於落選對星光財經有乜影響？Pauline承認，旗下網站128128.com瀏覽率跌咗一半，公司原本諗住大搞，家要重新部署。佢強調，網站07年底先推出，向來冇依賴廣告，所以打擊甚微，未來會繼續拓展「仙人指路」報價系統。