中國風電（182）大股東高振順（圖），最近喺股壇好似冇乜動靜，但原來積極部署愛女入局，董事會噚日就委任咗今年30歲嘅高穎欣Samantha做執行董事，初期月薪7萬蚊，佢本身有2000萬股風電喺手，按噚日收市價0.67蚊計，至少有1340萬身家。
曾任職大摩摩通滙豐
公告話，Samantha喺MountHolyokeCollege讀經濟同數學，再攞埋倫敦帝國管理學院嘅金融碩士，喺銀行界打滾7年，曾經喺大摩香港、倫敦摩根大通做過，今年8月前係滙豐結構性信貸及基金解決方案董事。背景咁猛，風電主席劉順興仲喺新聞稿大讚老闆女，話高小姐擁有豐富嘅資本市場經驗，對公司嚟講係「相當可貴嘅資產」。
風電同時又公佈，06年底開始擔任獨立非執董嘅何德民，因其他商業事務關係辭職，即時生效。呢份公告好感性咁話，何生見證咗公司由被拯救免於清盤，再由傳統參茸轉型至風電業務嘅歲月，貢獻亦獲得肯定咁話。