不計以配售方式掛牌的創板股，昨日3隻新股齊發，表現都無令投資者失望，升得最少的中國鐵鈦（893）報3.68元，較招股價高出約5％，盈德氣體（2168）報7.84元，高出12％，澳優乳業（1717）則最威水，收報5.10元，較招股價高出27％。
3隻新股僅比之前幾隻新股遲了幾天招股，照計即使近兩日市況好轉，都不應該會令首日掛牌表現相差如此巨大，究其原因，問題應該在招股價。
PE較蒙牛折讓兩成
有先前幾隻大股做參考，9月首輪招股的新股幾乎全部都定價進取，除了大行成功找到大孖沙接貨之外，首輪新股散戶也相對熱衷，造就投資銀行定價過份進取。
物極必反，幾隻以昂貴價格招股的新股令市場怨氣冲天，散戶加大戶齊縮沙，隨後的新股縱有較高質素都難以高昂水平定價，若上市計劃失敗，投行更加損失慘重，多月以來的努力化為烏有。
新股招股價有幾「海鮮」，原擬今日掛牌的寶龍地產（1238）可算經典，經調低後的招股價是2.75元，較原來上限價4.90元，大減44％，可見原先的上限價完全唔畀水位投資者。昨日3隻新股均以中下限定價，除盈德預測市盈率達23.3倍外，鐵鈦及澳優均不足20倍，特別是澳優，過去3年複合營業額增長超過108％，但PE仍較蒙牛（2319）折讓兩成，加上品牌因素，理應較蒙牛有溢價，唔係得個炒字。
歐陽風