香港保險業發展接近170年，外資、港資同中資等保險公司喺香江百花齊放，近日終於有人帶頭將接近兩個世紀嘅保險歷史結集成書，書名叫《厚生利群──香港保險史》。
冇逼下屬交數壓力
喺噚日新書發佈會上，會場星光熠熠，除咗新上任嘅保險業監理專員蔡淑嫻外，就連自從金融海嘯爆發後，甚少露面嘅保險業前一哥友邦保險（AIA），喺香港及澳門主席林文德帶隊下，幾乎「晒馬」出席，包括最新上場嘅香港及澳門首席執行官陳榮聲（Jacky），第一次喺傳媒前露面。
友邦最熱話嘅兩個題目，不外乎係幾時公開上市，同埋重奪本港保險一哥嘅目標，Jacky話，新上任CEO後，當然會有啲挑戰啦，不過AIA盤數好好，都冇乜要逼下屬交數嘅壓力。至於上市詳情就當然不便多講囉。Jacky話公司市場佔有率每季都上升，顯示業績同排名都一季比一季好咁話。