近期市場可謂聞「金」起舞，金價創歷史新高，搞到商品大王羅杰斯都要打倒昨日的我，全力CallBuy。同金唔同命，另一個「甘」就表錯情，以為自己係甘迺迪風靡萬千少婦，結果春秋大夢未成，就搞到身敗名裂。
職場色戒固然痕癢難耐，金魚缸的各種色誘亦毫不遜色。有冇發現，每當股市見底反彈，好消息總是一浪又一浪如狼似虎湧過嚟，新股定價高搞到潛水，轉眼一星期唔夠定價突然唔貴又可再升；澳元加息因經濟改善、失業率跌，美元就被質疑將失去國際結算貨幣地位，資金迅即流入香江買人民幣資產，金管局又再接錢接到手軟。
當好消息滿天飛之時，恒指幾日就升過千點，但背後其實已暗藏殺機。日前有消息指中東產油國原來同中國、俄羅斯及日本，已就係咪以一籃字貨幣同黃金取代美元計價，進行多輪秘密談判，美元即刻散晒。大家有冇諗過，其實呢類談判一直有進行，係傳媒神通廣大爆料，定係有心人放氣球，對美國的強美元政策試水溫？
造靚圖表引人落叠
眾所周知，美國冇條件加息，要退市、要救美元只係癡人說夢話。奧巴馬四面受敵，連前阿拉斯加州州長經濟盲佩琳都話佢冇用，全世界睇死佢，佢可能偏要振夫綱，突然強勢挺美元。當美元又再急速反彈，近日急升的資源同金價又會點？
分析市場消息唔難，難在睇通對股價影響有幾大。當然好消息一出，股價隨即上升，令人覺得係受消息帶動，跟住散戶就會盲目跟入，眼見3大支陽燭白武士出場、成交加大諗住實冇死，點知原來係刻意的訊息披露安排，方便閃電散貨。
有誠意的上市公司，平時會叫公關約股評人食飯，解釋業務亮點；冇誠意嘅就連飯局都慳番，索性將圖表有咁靚畫咁靚，總之要破腳穿頭、大成交突破上升陽燭兼收穩平均線，一副唔到你唔服的姿態去「勾引」股評人及記者眼球，只要稍為懶散唔做功課，飯局時又唔問清楚到底公司實際經營狀況，隨時助紂為虐，免費幫人做宣傳，心水清者應見唔少呢類文章。
胡孟青