呢幾日本地球迷嘅熱爆話題，肯定係下月18日香港對日本嗰場亞洲盃外圍賽嘅安排。球迷除咗不滿票價加到100蚊外，亦對球賽提早於傍晚6點20分開打大表憤怒。我求大俠八到，今次之所以遷就日本直播提前開波，全因日本過往對香港嘅賽事，無論奧運隊或者係大國腳，當地電視台都會付出約7位數字嘅轉播費，呢筆好大機會高過賽事門票收入嘅巨款，對有財赤危機嘅香港足總嚟講好重要。
不過，我求大俠都係打工仔一名，深明6點幾好多人都未放工，趕唔切去大球場支持香港隊；足總想收支平衡之餘，其實都要諗諗一班主場球迷嘅訴求，我求大俠相信足總如果早啲公開佢哋嘅苦衷，明白事理嘅球迷就自然唔會咁嬲。至於票價方面，香港隊領隊之一羅傑承喺佢個blog度，就話同足總主席梁孔德有共識，有可能減到60蚊，相信球迷條氣會順番少少啦！