應邀上京觀禮，在現場參觀閱兵嘅人士，當然係香港重要人士，在西環與下亞厘畢道心目中，好有統戰或回饋價值嘅，故稱之為要人，理所當然。一位朋友，就係要人之一。呢位A君上京回來，在皇后大道中碰到左丁山，帶住一對大黑超，幾有型噃。好彩佢仍然見到左丁山打招呼，傾番幾句。左丁山話：「你就威啦，觀禮名單有你份噃，北京係唔係好好玩呢？」要人A話：「唉吔，唔係話晒命，睇閱兵辛苦到癲。上京入到酒店，人人收到一個大信封。事先話明信封內有請柬，收到就務必出席，冇請柬就請留在酒店，不要外出，我就好彩收齊三張，包括到人民大會堂出席九月三十日晚宴會、十月一日早上閱兵、晚上睇煙火表演、吃晚飯幾舒服。第二朝就晨早出發，到咗現場觀禮台，按排位坐下，一坐就坐到十二點幾，去廁所要行好遠，自己唔敢飲水，只係用水潤吓喉嚨，好在陽光太猛，曬到出汗，於是減少便急，但忍得好辛苦，兼且曬到幾乎甩皮。晚上冇咁熱，稍為好啲，但忍水真係忍到皮膚乾，有啲老人家更加覺得辛苦。」出席保安過嚴嘅盛大聚會，係對體力與忍耐力嘅極大考驗，辛苦處不足為外人道。小YY在千禧年之時，仍在美國，與同學到紐約時代廣場參加2000倒數，現場人山人海，基本上前後擠逼，動彈不得，佢當時就見到（或者聞到）不少美國人當街小便。
要人A呻辛苦，其詞若有憾焉，心則實喜之，人一世，物一世，上京出席大盛會，若干年後，對個孫講古仔就會覺得好過癮。至於要人A為何得到邀請，佢就話：「你問我，我問邊個呀？總之有得去就無謂查問！」啱嘅，一啲事不宜追問，一問便俗。好似大記者咁，十月一日睇完大閱兵就揸車出街，忽然來電：「喂，由沙田去到觀塘都唔見有人掛國旗嘅？好冇氣氛喎！」大記者仲記得佢細路哥之時，佢住在左派機構對面，十月一日見到好多五星旗，到咗十月十日仲周街都見到青天白日旗。時代唔同咯，回歸後，香港已不見雙十掛旗，奇怪嘅係十月一日都唔見到有幾多五星紅旗。