曾俊華逃出鬼門關，根據佢自己講，好彩太太曾是專業護士，見佢心口痛，立即替佢量血壓、把脈，及時急召救護車，否則嘅話，既然醫生都話佢入院時已在危險狀態，稍一延誤，香港要搵新人做財政司司長咯，如果出現此情況，到曾特首有心臟病都似。曾特首甫自北京回港，立即去瑪麗醫院探病，顯見兩曾有兄弟之情。次日曾司長就精神奕奕地出院，曾特首可放下心頭大石。
有留意曾司長入院數天一事嘅賓架M注意到，十月一日離職嘅任總，好似冇去過瑪麗醫院探病噃，佢以此相詢，左丁山不防有此一問，立即坐定定，諗真啲，真係記唔起有報紙報導過任志剛到瑪麗醫院探曾俊華，反而李國寶嘅探病照片就唔止見過一次。按理全港各報記者雲集瑪麗醫院，任總一到，必然引起哄動o架，何解無此新聞呢？唔通瑪麗醫院另有秘密通道？想極都唔明，以此相問記憶力極佳嘅大編輯，大編輯亦話佢唔記得，未睇過有關任總探病嘅報導。
探病有時會阻止病人休息，未必一定受歡迎嘅，故此探唔探病，不必深究。但可以深究嘅，就係新任金管局總裁陳德霖與曾俊華司長以後是否會更好傾，更合作緊密？有啲人講廢話，話金管局應該獨立啲，免受政府影響，根本不識政治現實。美國財長蓋特納與聯儲局主席伯南克冇互相影響乎？以前魯賓與格林斯潘冇偈傾乎，金融海嘯之後，全世界嘅財政部與央行都加強溝通，增加合作力度，以防經濟突變，香港點可能例外！
陳德霖（睇完陶傑篇文章，唔敢叫佢做陳總）上班第一日，就面對傳媒，不慌不忙咁講出佢嘅工作四目標，一二三四咁背落去，無口窒窒與講完二唔記得三嘅毛病，顯見有備而來，事先做足功課而且記憶力強。唔好以為呢啲係易事，請大家將陳德霖嗰四點睇十次八次，然後對住塊玻璃鏡，面露笑容咁背番出嚟，最好同時用iPhone錄音，自己聽番，試睇吓自己係唔係講得好流利。試過就知道是否容易。